ဆေးဖက်ဝင် မာလကာရွက်
နေအိမ်အများစုမှာ မာလကာပင်တွေ စိုက်ပျိုးထားလေ့ရှိပြီး အသီးကိုသာ အဓိကထား စားသုံးလေ့ရှိကြပါတယ်။သို့သော်လည်း အများစု သတိမမူမိတဲ့အချက်ကတော့ မာလကာရွက်ရဲ့အံ့ဖွယ် ဆေးဖက်ဝင်အစွမ်းသတ္တိတွေပဲ ဖြစ်ပါတယ်။
မာလကာရွက်ဟာ သဘာဝ ဆေးဝါးတစ်မျိုးဖြစ်ပြီး ဓာတ်တိုး ဆန့်ကျင်ဂုဏ်သတ္တိ၊ ရောဂါပိုး မွှားတွေကူးစက်တာကိုကာကွယ် နိုင်တဲ့အစွမ်းသတ္တိ၊ ရောင်ရမ်းတာတွေ၊ နာကျင်တာတွေကို ပျောက်ကင်းစေတဲ့ ဂုဏ်သတ္တိတွေ ပါဝင်ပါတယ်။ ယနေ့ခေတ်မှာဆိုရင် မာလကာရွက်ကနေ ဆေးဝါးတို့၊ မာလကာရွက်လက် ဖက်ခြောက်တို့ပါ ထုတ်လုပ်သုံးစွဲ လာကြပြီဖြစ်ပါတယ်။
ကိုယ်အလေးချိန်လျှော့ချချင်ရင်လည်း မာလကာရွက်က ထောက်ကူပေးနိုင်ပြီး သွေးတွင်း သကြားဓာတ်ပမာဏကိုလျှော့ချ ပေးနိုင်တာကြောင့် ဆီးချိုရောဂါ အတွက်ပါ ကောင်းကျိုးပြုပါ တယ်။ မာလကာရွက်လက်ဖက်ခြောက်ကို သုံးလလောက် သောက်ပေးမယ်ဆိုရင် ခန္ဓာကိုယ်ကို အကျိုးမပြုတဲ့ ကိုလက်စထရောတွေကို ဖယ်ရှားပေးနိုင်တယ်လို့ဆိုပါ တယ်။
ဝမ်းပျက်ဝမ်းလျှောနဲ့ ဝမ်းကိုက်တာတွေဖြစ်ပြီဆိုရင်လည်း မာလကာရွက်က ဆေးဖက်ဝင် ပြန်ပါတယ်။ နောက်ပြီး အစာအ ဆိပ်သင့်တာတွေ၊ အော့အန်တာတွေနဲ့ အစာမကြေဖြစ်တာတွေကိုလည်း သက်သာပျောက်ကင်းစေပါတယ်။ ဒါ့အပြင် ပန်းနာရင်ကျပ် ရောဂါအတွက်ဆိုရင်လည်း မာလကာရွက်နဲ့ ကုသနိုင်ပါသေးတယ်။
သွားကိုက်တာ၊ လည်ချောင်းနာတာနဲ့ သွားဖုံးရောဂါတွေဆိုရင်လည်း မာလကာရွက်လတ်လတ်ဆတ်ဆတ်ကို ချေပြီးအရည်ညှစ် ပလုတ်ကျင်းပေးရင် ပျောက်ကင်းနိုင်ပါတယ်။ ဒါကြောင့်မို့ မာလကာရွက်ကို သွားတိုက်ဆေးထုတ် လုပ်ရာမှာထည့်သွင်းကြပါတယ်။ ခံတွင်းနံ့ သင်းဖို့အတွက်သာမက ခံတွင်းကျန်းမာရေးအတွက် မာလကာရွက်ကို ကြိတ်ခြေအနှစ်ပြုလုပ်ပြီး အိမ်မှာသဘာဝဆေးဝါး အဖြစ်သုံးနိုင်ပါတယ်။
မာလကာရွက်ကို သွေးလွန်တုပ်ကွေးရောဂါနဲ့ ပရော့စတိတ် ကင်ဆာရောဂါကုသဖို့လည်း အသုံးပြုပါတယ်။ ဓာတ်မတည့်လို့ ယားယံတာ၊ အဖုအပိမ့်ထွက်တာတွေဖြစ်ရင်လည်း မာလကာရွက်နဲ့ ပွတ်ပေးရင် သက်သာပျောက် ကင်းနိုင်သလို ထိခိုက်ရှနာဖြစ်ရင်လည်း မာလကာရွက်ကို ကြိတ်ခြေပြီး အုံပေးရင် ပျောက်ကင်းနိုင်ပါတယ်။
အရေပြားအရောင်မမှန်တာတွေ၊ ဝက်ခြံ၊ ဆားဝက်ခြံတွေကိုလည်း မာလကာရွက်အနှစ်နဲ့ သုတ်လိမ်းပြီး ပျောက်ကင်းအောင်ပြုလုပ်နိုင်သလို မာလကာရွက်အနှစ်နဲ့ ပေါင်းတင်ပေးရင်လည်း အရေပြားတွန့်တာတွေ ပျောက်ကင်းပြီး တင်းရင်းလှပစေပါတယ်။ ဒါတင်မကသေးဘဲ မာလကာရွက် လက်တစ်ဆုပ်စာကို ရေတစ်လီတာလောက်နဲ့ မိနစ် ၂၀လောက်ပြုတ်ပြီး အေးသွားတဲ့အခါ မာလကာရွက်ပြုတ်ရည်နဲ့ ဦးရေပြားကို သုတ်လိမ်းပြီး နှိပ်နယ်ပေးရင် ဆံပင်ကျွတ်တာတွေ ပျောက်ကင်းပြီး သန်စွမ်းစေပါတယ်။
Credit – 7 Day Daily
