ချွဲသလိပ်ပျော်၍ အခိုးပွင့်စေတဲ့ ခွေးတောက်ရွက်အာနိသင်
ဆောင်းရာသီမှာ ချောင်းဆိုးရင်ကြပ်၊ ချွဲသလိပ်ခပ်နေရတာ အဖြစ်များကြတာကို အတွေ့များနေရပါတယ်။ အဲ့ဝေဒနာအတွက်” ခွေးတောက်ရွက်ခြောက်”က သမားကျော်ပါလို့ ဆိုရပါမယ်။ သူ့ကို ရေနွေးကြမ်းထဲ လဖက်ခြောက်အစား ခပ်သောက်ရင် ချွဲသလိပ်တွေပျော်ပြီး ခန္ဓာကိုယ်တစ်ခုလုံး အခိုးပွင့်ပြီး ရေချိုးလို့လည်း ကောင်းပါတယ်။ အရွက်ကို အခြောက်လှမ်းတဲ့အခါ ဆားရည် ၅မိနစ်စိမ်၊ ရေစင်စင်ဆေးပြီး နေတစ်ရက်လှမ်းပြီး နောက်ရက်တွေမှာ အရိပ်ထဲမှာပဲ လှမ်းပေးရပါတယ်။ (၇)ရက်လှမ်းပြီးရင် သုံးလို့ရပါပြီ။
ရေနွေးကြမ်းသောက်သလို မကြာခဏ သောက်နေရင် ပိတ်နေတဲ့ အခိုးတွေပွင့်ပြီး ချွေးတစိုစိုနဲ့ရှိနေတတ်ပါတယ်။ တစ်ခါသောက် လဘက်ရည်တစ်ပန်းကန်စာကို နံနက်၊ နေ့လည်၊ ညနေ၊ ည တစ်ကြိမ်စီ သောက်ပေးလို့လည်း ရပါတယ်။ ကျွန်တော်ကတော့နေ့စဉ် သောက်ပါတယ်။ အခုနေ လှမ်းထားတာက ဒုတိယအသုတ် လှမ်းတာပါ။ အရင်ရှိပြီးသား ခွေးတောက်ရွက်ခြောက်တွေ ကုန်ခါ နီးနေလို့ပါ။ ဓါတ်ဗူးထဲကို ခွေးတောက်ရွက်ခြောက် ငါးရွက်ကို ထည့်ပြီး ငါးမိနစ်လောက် နှပ်ထားပြီးမှ သောက်ပါ။ အရောင်က အဝါဖျော့လေးနဲ့ စိမ်းရွှေရွှေ အနံ့လေးရပေမယ့် အရွက်အစိုလို အခါးဓါတ်မပြင်းပဲ သောက်လို့ အဆင်ပြေပါတယ်။
Credit–Shwe La Thar Wi
